2Cor 6 | KMG | STEP | Anuture babaficfâc nâŋe mu âkesiŋ eŋarehuc šiŋuc ŋazaeŋgopeneŋ: “Anuture aki anonoc tahac-ŋopakicne i fârimâc mi ezejec.”

2 Corinthians 6

Paulo e Anuture ŋic juhuc wiac bocjaha erahuc fuŋne-ticne bataniŋkewec

1 Anuture babaficfâc nâŋe mu âkesiŋ eŋarehuc šiŋuc ŋazaeŋgopeneŋ: “Anuture aki anonoc tahac-ŋopakicne i fârimâc mi ezejec.” 2 Dâŋ šiŋuc hâcne fokac:

“No dameŋ biaŋko mana-garepo
â bâbâpiaŋ dameŋko baficgupo.”
Manaŋgopieŋ,dameŋ biaŋ jâmbâŋ šine hâcne, â bâbâpiaŋ dameŋ iŋuc jaha šine hâcne. 3 Nâŋe ŋic jaŋe gie bapa-nâŋec surenšipiŋte gâŋ ŋezic mi ejareeŋgopeneŋ. 4 Nâŋe Anuture gieŋic jueŋgopeneŋ irec fuŋne bataniŋkehuc wiac šiŋuc eraeŋgopeneŋ: Ʒâicmaŋko maŋuruc jueŋgopeneŋ, šârâ hâriŋ faio jueŋgopeneŋ, fific guguriŋ faio jueŋgopeneŋ, hâhâwic maŋko jueŋgopeneŋ, 5 šika faio jueŋgopeneŋ, kâpâcwâru ficko ŋeeŋgopeneŋ, râsi ŋondeŋko jueŋgopeneŋ, giere šâic manaeŋgopeneŋ, guŋɋâri jueŋgopeneŋ, nânâ tâmiricko jueŋgopeneŋ, 6 bahac fâsâc jueŋgopeneŋ, mamana tarahec jueŋgopeneŋ, bumâteŋ jueŋgopeneŋ, âgo jauŋ ejareeŋgopeneŋ, Tiri Mârohec jueŋgopeneŋ, maŋjauŋ fârihec jueŋgopeneŋ, 7 dâŋ fâri qizecne mueŋgopeneŋ, Anuture tâpirio jueŋgopeneŋ, mitire sându marohec jueŋgopeneŋ, 8 mumumbiaŋ â mimi qaqa ŋoŋondeŋko jueŋgopeneŋ, mu bâsâoc â mufec muriŋ ŋoŋondeŋko jueŋgopeneŋ, burecŋic munârehapie siocmâc jueŋgopeneŋ, 9 fuŋne-nâŋec basahapie biŋe rarahec jueŋgopeneŋ, hâmozo eeŋgopeneŋzi sifu ɋâricne jueŋgopeneŋ, nâpo sipiric ekicnezi sifu mi omaeeŋgopeneŋ, 10 busâqoc enârekicnezi sifu bubiaŋko jueŋgopeneŋ. hapetaczi sifu ŋic bocjaha bâmec bajareeŋgopeneŋ, wiac babasanezi sifu mâriri sâkohec jueŋgopeneŋ.

Paulo e Korinti ŋic jaŋere maŋne kâcɋene domawec

11 O Korinti ŋicbureŋ, maŋnâŋec ŋoŋerea kâcɋene domame micnâŋec afeckekac hâcne. 12 Maŋzi sanaŋnea šâfic-ŋopaŋgopeneŋ, ŋoŋere maŋjauŋ ine afecne mac fokac. 13 Eme no naru motecfâc-nane ŋoŋe ŋazape: Ŋoŋe okacne bazuhuc iŋuc jaha maŋŋeŋic nâŋere râepie kâcɋenea domazejec.

Sâqocne â biaŋne jahe ââgo mi enicmu

14 Ŋic qâpuc jaŋe jâcjeŋic reŋkepie ŋoŋe mi bafic-jopanšepieŋ. Tiŋne â hehesic jahe wemocko ââgo enicmu? Me tatamac â dapâc jahe wemocko šâšâfic enicmu? 15 Me Kristo â râsi qizec-ticne jahe wemocko maŋ mocjaha enicmu? Me opâ ruac â qâpuc jaŋe wemocko qâfâsâeniŋmu? 16 Me Anuture ufuŋ â nemuɋâŋ jahe wemocko šušuhuc enicmu? Manaŋgopieŋ, Anutu jujunere ufuŋ i nâŋâc. Anutuzi šiŋuc hâcne muwec:

“No ŋondeŋ-jeŋicko ŋeŋe juju epemu,
ehuc Anutu-jeŋic ehape
jaŋe ŋicfâc-nane junšepieŋ.
17 Irec qâpuc behec-joparâ
bâtâcko junšepieŋ, Wofuŋzi iŋuc mukac.
Erâ wiac mamakâcne ba bâuac mi enšepieŋ,
eme noni hezu hewâneŋ eŋarepemu.
18 Erâ mamac eŋarehape
naru motecfâc-nane erâ junšepieŋ.
Wofuŋ bapa-fâre e dâŋ iŋuc mukac.”